कोंकणी भाशा मंडळ, गोंय प्रकाशीत ॲड. उदय भेंब्रे हांच्या ‘यादींचो कुरपणो’ ह्या पुस्तकाचो लोकार्पण सुवाळो 13 जानेवारी 2025 (सोमार) दिसा जातलो. साहित्यीक आनी संघटक ॲड. उदय भेंब्रे हांणी कोंकणी भाशीक चळवळींतल्या उगडासांचेर आदारून हें पुस्तक बरयलां. ह्या पुस्तकाचो लोकार्पण सुवाळो मडगांवच्या रवींद्र भवनांत परिशद सभाघरांत सांजे 4.00 वरांचेर जातलो.
पुस्तकाच्या लोकार्पण सुवाळ्याक अखिल भारतीय कोंकणी परिशदेचे अध्यक्ष फा. मोउजीञु द. आताईद अध्यक्षीय उलोवप करतले. तशेंच लेखक आनी समिक्षक प्राचार्य डॉ. भूषण भावे मुखेल सोयरे आनी लेखक आनी शिक्षक भौ. अनंत अग्नी हे मानाचे सोयरे आसतले, अशें कोंकणी भाशा मंडळाचे सचीव मंगलदास भट हांणी उजवडायल्ले प्रसिद्धी पत्रकांत म्हणलां.
यादींचो कुरपणो हें पुस्तक कोंकणी भाशेचो संघर्श आनी ह्या संघर्शाचो एक गवाय जावन घेतिल्ल्या अणभवांचेर आदारून आसा, अशें मंडळाची अध्यक्ष रत्नमाला दिवकार हांणी सांगलें. इतिहासीक नदरेन म्हत्वाच्या अशा ह्या पुस्तकाच्या लोकार्पण सुवाळ्याक व्हडा संख्येन हाजीर रावचें अशी विनवणी रत्नमाला दिवकार हांणी केल्या.
