कोंकणी भाशा मंडळ, गोंय 30 सप्टेंबराक आपले स्थापनेचें 60वें वर्स मनयता. हिरक महोत्सवा निमतान, मंडळान दोन दिसांच्यो कार्यावळी आयोजीत केल्यात. 30 सप्टेंबराक मडगांवच्या रवींद्र भवनांत जावपी वर्धापन दीस कार्यावळींत, गोंय आनी कोंकणी खातीर निसुवार्थीपणान कार्य केल्ले खातीर स म्हालगड्यांचो भोवमान जातलो.
भौ. नागेश करमली, ॲड. उदय भेंब्रे, भौ. दामोदर मावजो, भौ. पुंडलीक नायक, भौ. मीना काकोडकार आनी भौ. हेमा नायक हांचो जिवन गौरव पुरस्कार भेटोवन भोवमान जातलो. हे कार्यावळीक मुख्यमंत्री डॉ. प्रमोद सावंत मुखेल सोयरे म्हणून हाजीर रावतले जाल्यार मानाचे सोयरे म्हणून मुंबयच्या द टाटा इन्स्टिट्यूट ऑफ सोशल सायन्सीसच्या स्कूल ऑफ डेव्हलोपमेंट स्टडीजचे डीन आनी लेखक प्रो. डॉ. अश्वनी कुमार हे हाजीर रावतले.
तशेंच, गोंय आनी कोंकणी खातीर निसुवार्थीपणान कार्य केल्ले खातीर भौ. लोर्ना कोर्देयरो, पं. अजितकुमार कडकडे, भौ. राजेंद्र आर्लेकार, भौ. अवधुत तिंबलो, भौ. दत्तराज साळगांवकार, भौ. श्रीनिवास धेंपो, भौ. डॉ. प्रमोद साळगांवकार आनी भौ. कमलाक्ष नायक हांकां मंडळाचें मानद वांगडीपद भेटयतले. हिरक महोत्सवा निमतान ‘कोंकणी’ ह्या विशेश अंकाचेंय मानेस्तांचे हस्तुकीं लोकार्पण जातलें.
औपचारीक कार्यावळी उपरांत रवीन्द्र केळेकार ज्ञानमंदीर निर्मीत ‘कोंकणीची मठी कर्तव्याची साठी’ ही खाशेली गीत, संगीत आनी नाट्याची कार्यावळ जातली.
1 ऑक्टोबराक मडगांवच्या गोमंत विद्या निकेतनांत वर्सुकी पुरस्कार भेटवण सुवाळो जातलो. ह्या सुवाळ्याक मुखेल सोयरे म्हणून भारतीय साहित्यीक अरूण कमल हे हाजीर रावतले. मानाचे सोयरे म्हणून जेश्ठ साहित्यीक मीना काकोडकार, कोंकणी म्हालगडे नारायण मावजो, गोंय शालांत मंडळाचे आदले अध्यक्ष जुझे रिबेलो, जेश्ठ कोंकणी कार्यकर्ते आर. बी. एस. कोमरपंत, आनी संचालक, प्रशिक्षण आनी सचीव, जीपार्ड सोसायटी मायकल डिसोझा आय.ए.एस, हे मानेस्त हाजीर रावतले.
मंडळाच्या हिरक महोत्सवी कार्यावळींनी कोंकणी प्रेमींनी व्हडा संख्येन हाजीर रावपाचें आवाहन मंडळाची अध्यक्ष अन्वेषा सिंगबाळ हांणी केलां.
वर्सुकी पुरस्कार जैतीवंत सकयल दिल्ले प्रमाण आसात-
कोंकणी भाशा मंडळ पुरस्कृत सेवा पुरस्कार
मार्टिन मिनीन फॅर्नांडीस, गुरुदास सामंत, उदय देशप्रभू, प्रभाकर भिडे, अर्चना कामत
सॅराफीन कोता पुरस्कृत फेलिस्यु कार्दोज यादस्तीक शिक्षक पुरस्कारः
कृष्णाबाय (बिना) नायक
विन्सी क्वाद्रूस पुरस्कृत जुझे पियेदाद क्वाद्रूस यादस्तीक कार्यकर्तो पुरस्कारः
गोपिनाथ गांवस, अपर्णा गारुडी, रेवणसिध्द नायक, राजदीप नायक, जॉन फर्नांडीस
लिगोरियो फुर्ताद ट्रस्ट पत्रकारिता पुरस्कारः
प्रमोद आचार्य
दिनेश मणेरकार पुरस्कृत चंद्रकांत केणी यादस्तीक स्तंभलेखन पुरस्कार:
मुकेश थळी
दिनेश मणेरकार पृरस्कृत रामनाथ मणेरकार यादस्तीक अणकार पुरस्कार:
सुनेत्रा जोग (पुस्तक – सैनीक)
स. नरसिंह दामोदर नायक यादस्तीक साहित्य पुरस्कार:
फा. सुकोर रिबेलो (पुस्तक – खेळ खेळोया)
स. रॉक बार्रेटो यादस्तीक साहित्य पुरस्कार:
अरविंद भाटिकार (पुस्तक – कर्मण्ये, कादंबरी)
कोंकणी भाशा मंडळ पुरस्कृत रमेश वेळुस्कार यादस्तीक साहित्य पुरस्कार:
सु. म. तडकोड (पुस्तक -कोंकणी चम्पू काव्य – गायत्री देवी)
मनोहरराय सरदेसाय यादस्तीक बाल साहित्य पुरस्कारः
अविनाश कुंकळकार (पुस्तक – शेणिल्लें भुरगेंपण).
