पुस्तक परिक्षण करतना प्रामाणीक रावप म्हत्वाचें – डॉ. तन्वी कामत बांबोळकार

0

कोंकणी भाशेंत पुस्तक परिक्षण तशेंच संशोधनात्मक वावराक खूब वाव आसा. विद्यार्थ्यांनी मोट्या प्रमाणांत हो वावर करपाची गरज आसा अशें मत लेखक आनी सहाय्यक प्राध्यापक डॉ. तन्वी कामत बांबोळकार हांणी उकतायलें. कोंकणी भाशा मंडळ, गोंयान आयोजीत केल्ल्या पुस्तक परिक्षण लेखन ह्या विशयावेल्या व्याख्यानांत मार्गदर्शक म्हूण त्यो उलयताल्यो.

भांगरभूंय दिसाळें तशेंच हेर कांय मासिकांचेर आतां पुस्तक परिक्षणां येवपाक लागल्यांत. ही खूब बरी गजाल. कोंकणी तशेंच हेर भाशेंतल्या पुस्तकांचीं परिक्षणां जावपाक जाय पूण परिक्षण करतना प्रामाणीक रावप सामकें म्हत्वाचें अशें डॉ. तन्वी बांबोळकार हांणी मुखार सांगलें. हें व्याख्यान गुगल मीट वरवीं जालें. तशेंच मंडळाच्या फेसबूक पानाचेर आनी यू-ट्यूब चॅनलाचेर तें उपलब्ध आसा.

कोंकणी भाशा मंडळाचे सचीव उल्हास गांवकार हांणी सगळ्यांक येवकार दिलो. सनीला साळगांवकार हांणी सुत्रसंचालन केलें आनी वल्लभ बर्वे हांणी मानेस्ताची वळख तशेंच उपकाराचें उलोवप केलें. कार्यावळीक सुमार 145 भाशा मोगी आनी आस्वादक जोडिल्ले.

कोंकणी निबंद लेखन ह्या विशयाचेर मंडळान व्याख्यान आयोजीत केलां. हें व्याख्यान शुक्रार, 14 मे 2021 दिसा सांजे 6.00 वरांचेर ऑनलायन माध्यमांतल्यान जातलें. लेखक आनी शिक्षक भौ. अनंत अग्नी मार्गदर्शन करतले. ही कार्यावळ मंडळाच्या फेसबूक पानाचेर थेट वितरायतले. पुनम बुर्ये आनी प्रणिता शिरगांवकार कार्यावळीचें संयोजन करतलीं.

LEAVE A REPLY

Please enter your comment!
Please enter your name here