नामनेचे कथाकार आनी कादंबरीकार दामोदर (भाई) मावजो हांकां भारतांतलो सगळ्यांत व्हडलो साहित्यीक सन्मान, ‘ज्ञानपीठ पुरस्कार’ प्राप्त जाला. कोंकणी भाशा मंडळ, गोंयान तांकां परबीं भेटयल्या. ज्ञानपीठकार रवीन्द्र केळेकारा उपरांत दुसरे फावट कोंकणी भाशेक हो सन्मान लाभला.
कथा आनी कादंबरी केळयतनाच एक बरे निबंदकार, समिक्षक आनी पटकथा तशेंच संवाद लेखक म्हणून भाई मावजो हांची नामना आसा. तांची आयज मेरेन साबार पुस्तकां प्रकाशीत जाल्यांत. ते भायर तांची संपादीत आनी अणकारीत पुस्तकांय उजवाडाक आयल्यांत. राज्य आनी राष्ट्रीय पांवड्या वयले जायते पुरस्कार तांकां फावो जाल्यात.
तांची ’कार्मेलीन’ कादंबरी 22 वयर भासांनी अणकारीत जाल्या. ते भायर तांचे कथांझेले आनी कादंबर्यो इंग्लीशींत अणकारीत जाल्यात. ‘तेरेझास मॅन’ हें पुस्तक 2015 वर्सा आंतरराष्ट्रीय प्रतिश्ठेच्या फ्रॅंक ओ कॉनर इंटरनॅशनल अवॉर्डा खातीर नामांकीत जाल्लें.
लेखना वांगडाच आपली पुराय जीण कोंकणी तशेंच पुरोगामी चळवळीक ओंपतना मावजो हांकां मरणाची धमकी लेगीत सोंसची पडली. पुरोगामी आनी प्रागतीक विचारांचे समर्थन केल्ले खातीर देशांतल्या कांय हिट लिस्टार आशिल्ले लेखकां मदीं तांचें नांव सांपडलें आनी तेन्नाच्यान आयज मेरेन ते पुलीस सुरक्षीतते खाला आसात. आपल्या निर्भीड आनी स्पश्ट सभावा खातीर फामाद आशिल्ले भाईन सदांच भारतीय साहित्यीक आशिल्ल्याचो अभिमान बाळगिला आनी तरणाट्यांक प्रेरणा दिल्या.
दामोदर मावजो हे कोंकणी भाशा मंडळाचे आदले अध्यक्ष. तांच्या अध्यक्षते खाला मंडळान पयलें कोंकणी संगीत संमेलन घडोवन हाडिल्लें. सदांच सगळ्यांक एकठांय घेवन मुखार वचपाचो तांचो हावेस. मंडळाचें फुडारपण करतना तांणी हो विचार सदांच मुखार व्हेलो आनी आपल्या सांगातान कितल्याशाच तरणाट्यांक मंडळाच्या कार्यांत सहभागी करून घेतले. साबार राष्ट्रीय तशेंच राज्य पांवड्यावेले संस्था तशेंच समितींचेर मावजो हांणी काम केलां.
कोंकणी मनीस एक ही भावना काळजांत बाळगून निश्ठेन कोंकणीची सेवा करपी भाई मावजो म्हणल्यार तरणाट्यां खातीर एक प्रेरणा स्थान. तांकां लाभिल्ल्या ह्या पुरस्कारान कोंकणी भाशेक आनीक एक राष्ट्रीय थरावेलें जैत मेळोवन दिलां. तांची साहित्य सेवा अशीच चालू उरची आनी तांचे प्रेरणेंतल्यान कोंकणी भास फुलत उरची अशें मंडळाचे वतीन उजवाडायिल्ल्या प्रसिद्धी पत्राकांत मंडळाची अध्यक्ष अन्वेषा सिंगबाळ हांणी म्हणलां.
