आज आमी तंत्रज्ञानाचो वापर करून कोंकणी भाशे खातीर शक्य आसा तशीं तांत्रीक साधनां विकसीत करपाक जाय. हे करपा खातीर जे संशोधन जावपाक जाय ते कोंकणी मनश्यानूच करचें पडटलें. तंत्रज्ञानाचो वापर करून भुरग्यां खातीर कोंकणीतल्यान उलोवपी रोबोट आनी हेर ऑनलायन खेळ तयार करपाची गरज आसा. विंगड-विंगड मळांनी भोव भाशीक अध्ययना खातीर गोंयच्या तरनाट्यांनी आनी संस्थानी माथे मारपाची गरज आसा. तशेंच विकीपिडीयाचो चडांत-चड उपयोग करून डिजीटल माध्यमां बळिश्ट करपा खातीर वावुरपाक जाय अशें कला अकादेमीच्या नाट्य महाविद्यालयाचे प्राचार्य भौ. रामराव वाघ हांणी सांगलें. कोंकणी भाशा मंडळान विद्याभुवन कोंकणी शाळा आनी रवीन्द्र केळेकार ज्ञानमंदीर हांच्या जोड-पालवान आयोजीत केल्ल्या संवसारीक मायभास दीसाच्या कार्यावळींत ते मुखेल सोयरे म्हणून उलयताले. भोवभाशीक अध्ययना खातीर तंत्रज्ञानाचो वापर ह्या विशयाचेर तांणी आपली मतां मांडली.
ज्या भाशेंतल्यान आमी विचार करतात तीच आमची मायभास. आयज आमकां दुसर्या राज्यांतले लोक येवन गोंयची जेवणां करून वाडटात. ते आयज कोंकणी भास अभिमानान उलयतात. जाल्यार थळावे लोक कोंकणी भास उलोवपाक लजतात. ते भारतीय भासा सोडून इंग्लीश सारकेल्ल्या भासांक मोठी करपाक वावुरतात अशी भिरांत तांणी उक्तायली. आयज आमच्या तरणाट्यांनी वेगळी विचार सरणी घेवन मुखार वचपाक जाय. आयज विद्वत्तेक मोल आयलां. खंयच्याय मळार, खंयच्याय भाशेची विद्वत्ता आसल्यार तुमकां इंग्लीश येवपाकूच जाय म्हणून ना अशें तांणी फुडें उलयतना सांगलें.
मडगांवच्या कोंकणी भवनांत आयोजीत ह्या कार्यावळीक मुखेल सोयरे म्हूण प्रा. रामराव वाघ, मानाचे सोयरे म्हणून गोपिनाथ गांवस, कोंकणी भाशा मंडळाची अध्यक्ष अन्वेषा सिंगबाळ, विद्याभुवन कोंकणी शाळेच्या वेवस्थापन समितीचे अध्यक्ष चेतन आचार्य, रवीन्द्र केळेकार ज्ञानमंदीराचे मुख्याध्यापक अनंत अग्नी, विद्याभुवन कोंकणी शाळेची मुखेली अक्षता व्यास हजर आसली.
सगळ्यांनी आपल्या भाशेविशीं अभिमान दवरपाक जाय कारण तातूंत आत्मियता आसता. आमच्या मायभाशेंतल्यान उलोवप म्हणल्यार आमकां केन्ना केन्ना उणाकपण दिसता. मात आमकां व्यक्त जावपाक वा खंयचीय गजाल ठामपणान सांगपाक आपलीच भास उपेगाक येता अशें लेखक गोपिनाथ गांवस हांणी सांगलें.
संवसारीक मायभास दिसाचे आमचे जिणेंत खाशेलें म्हत्व आसा. कोंकणी भास फुलोवपाक आनी तिगोवपाक आमी वावुरपाक जाय. भास तिगोवप आव्हान जरी आसलें तरीय शिक्षण आनी तंत्रज्ञानाच्या माध्यमांतल्यान आमकां तें शक्य आसा अशें अन्वेषा सिंगबाळ हांणी सांगलें.
ह्या वेळार विद्याभुवन कोंकणी शाळेंतली विद्यार्थीनी अन्वी नायक आनी आराध्या पै रायतुरकार हांची उलोवपां जालीं. सुत्रसंचालन अर्चा बोरकार हिणें केलें आनी उपकार अक्षता व्यास हिणें मानले.
