नावेली रोजरी वाणिज्या आनी कला महाविद्यालय, कोंकणी विभाग आनी चंद्र प्रकाश प्रकाशनाचे वतीन ‘ताळो’ पुस्ताकाचें प्रकाशन सुवाळो घडोवन हाडलो.
नावेली रोजरी म्हाविद्यालयांतल्या सभाघरांत जाल्या सुवाळ्यांत जेश्ट साहित्यीक भौ. दत्ता दामोदर नायक हांच्या हस्तुकीं ताळो (निबंद) पुस्तकाचें प्रकाशन जालें. ह्या वेळार मानाचे सोयरे म्हूण कोंकणी भाशा मंडळाचे अध्यक्ष भौ. अन्वेषा सिंगबाळ, दाल्गाद कोंकणी अकादेमीचे अध्यक्ष भौ. विन्सी क्क्वाद्रुस, पुस्तकाचेर उलोवपी भौ. विशाल सिनाय खांडेपारकार, फादर गाब्रियल कुतान्हो, प्रा डॉ हॅरीक बारर्टो आनी ताळो पुस्तकाचे लेखक फा. मायरन बार्रेटो हाजीर आसले. ह्या सुवाळ्याक धरूनूच कांय साहित्यिकारांचो भोवमान घडोवन हाडले. कार्यावळींचे सुरवेक प्रा डॉ हॅरीक बारर्टो हांणी मानेस्तांक येवकार दिलो.
देवशास्र आनी तत्वगिन्यान सारके विशय खूबच सोप्यां उतरांनी सांगपाची कळाशी लेखक मायरनाक सादल्या. मुळांत ‘ताळो’ हें पुस्तक ताळ्यांचीं साबार रुपां आमच्या मुखार दवरता. आनी अदीक करून मनशाच्या ताळ्याचे बळ आमचे मुखार दवरता. हो ताळो सैमाचो ताळो जातनाच वैश्वीक जावचो अशें मत लेखक विशाल सिनाय खांडेपारकार हांणी मांडले.
‘ताळो’ वाचतना दरेक निबंदांत लेखकान ‘अलंकार’ नटोवंक तकालस घेतल्या. जशी एक सोबीत-सुंदर अस्तुरी आपली सुंदरताय वाडोवंक आभुशणांचो उपेग करता, तेच वरीं लेखक मायरनान आपले भाशेची गिरेस्तकाय वाडोवपाक आनी ती अदीक सुंदर जावपाक, अलंकारांचो प्रयोग केला. अर्थांत, जी शब्द काव्यांची सोबाय वाडोवपाक अलंकार घाल्यात, देखून ताची तोखणाय. तशेंच ‘ताळो’ झेल्यांत लेखकान ‘सिनॅथ्रोस्मस’ (Synathroesmus) हो प्रकार खेळयला. विशेशणांचो निबंदांत वापर चड जाता. सर्वसादारणपणान अशे जाणकार मानतात- वाचकांक विचलीत करपाच्या मार्गान डिव्हायसाचो अती वापर करप सोपें आसूंक शकता. देखून लेखकान ह्या डिव्हायसाचो योग्य वापर करून, ताचें कांय निबंद वजनादीक, गडगंज आनी तोला- मोलादीक जाल्यांत – भौ. विशाल खांडेपारकारान सांगलें.
भौ. दत्ता दामोदर नायक हांणी – मायरनाचें पुस्तक सोबीत आसा कित्याक तें वाचूक दिसता. हांवें तें वाचलें आनी म्हाका तें आनीक वाचूंक दिसलें. धंदेकाराचो एक नेम आसा ROTI (Return On Time Invested). ताचें पुस्तक वाचूंक हांवें वेळ काडलो आनी म्हाका कितें तरी परत मेळ्ळें. म्हजो वेळ फुकट वचूंक ना. मनीस आनी सावदां हांचे मदलो भेद सांगतना म्हणलें हांकां ताळो आसा. पूण मनशाक एक भास आसा. गोंयकारांक कोंकणी भास आसा. मनशाक विचार आसात. मनीस विचार करता. कांय वेळां आमी वोगी म्हळ्यार मोनेळ पाळूंक जाय. ही शिकवण सगळ्या धर्मांत आसा. उलयत रावता तो सांडटा. देखून फादर मायरनान मोनेळाचेर लिखाण करचें. ताळो नाशिल्ल्यांचो ताळो आमी जावपाक जाय- दत्ता नायकान सांगलें.
फा. मायरन साहित्याच्या घोड्याचेर धांवतलो सृजनशील बरोवपी,’ अशें भौ. विन्सी कुवाद्रुश उदगारले. मायरनाचे लेखणेक वजन आसा. ताचे दरेक लेख हो भौसाचो आवाज आनी ताळो जावन उलयत. तो जाणकारां कडेन भासाभास करता, तांचें मत आनी सुचोवण्यो घेता आनी प्रभावीत बरप करता म्हण सांगलें.
फादर गाब्रिलान कुतीन्होसांगलें – आयज कोंकणी भास उलोवपाक आमगेले गोंयकार भाव-भयणीं लजतात. हें सारकें न्हय. आमी आमची आवय भास उलोवपाक बळगें दिवपाक जाय. तशेंच कोंकणी उलोवया आनी हो समाज बरो खुशाल आनी बरे भलायकेचो करूंया असो उलो फादरान मारलो.
भौ. अन्वेशा सिंगबाळ हांणी ताळो नाशिल्ल्यांचो ताळो जावंक फा. मायरनान प्रयत्न केल्ल्यात. ह्या समाजांत जायत्यांचे ताळे बोडाये वरवीं दामून दवरतात. आमी एकवटान येवन आमचो ताळो उबारूंक जाय म्हण सांगलें.
प्रा. सुत्रसंचालन वैभव माजाळेकार हांणी केलें, उपकार लेखक फा. मायरन बार्रेटो मानले. फा. मायरन जेसन बार्रेटो, कोंकणीचो मोगी, लेखक आनी कार्यकर्तो. ताणीं साहित्यीक मळार ५ पुस्तकां आनी धर्मीक मळार ९ पुस्तकां उजवाडायल्यांत. गोंय राज्याचो युवा सृजन पुरस्कार, दाल्गादो कोंकणी आकादेमीचो ‘दाल्गादो तरणाटो पुरस्कार’ आनी कोंकणी भाशा मंडळाचो ‘सर्गेस्त नर्सिव दामोदर नायक यादस्तीक साहित्य पुरस्कार,’ ‘ओपारिंतल्यान संदेश,’ ह्या पुस्तकाक लाबिल्लो आसा.
